काठमाडौं । उच्च अदालत पाटनले काठमाडौंका मेयर बालेन्द्र शाह (बालेन)लाई तत्काल स्पष्टीकरण नसोध्न नेपाल नागरिक उड्डयन प्राधिकरणलाई आदेश दिएको छ । बिहीबार न्यायाधीश धिरबहादुर चन्दको इजलासले बालेन शाहसँग स्पष्टीकरण माग गर्ने प्राधिकरणको पत्र कार्यान्वयन नगर्न अल्पकालीन अन्तरिम आदेश दिएको हो ।
नागरिक उड्डयन प्राधिकरणको निर्माणाधीन भवन नक्सापास नभएको भन्दै काठमाडौं महानगरपालिकाले फेन्सिङ तार काटेको थियो । ३२ जेठमा विमानस्थल परिसरको फेन्सिङ तार काट्नु नागरिक उड्डयन प्राधिकरण ऐन २०५३ विपरीत रहेको भन्दै प्राधिकरणले मेयर शाहसँग स्पष्टीकरण सोधेको थियो ।
तर, मेयर शाह प्राधिकरणले सोधेको स्पष्टीकरण बदर गर्न माग गर्दै बिहीकार अदालत पुगेका थिए । मेयर शाहले उच्च अदालतमा दिएको निवेदनमाथि सुनुवाई गर्दै अदालतले तत्काल बालेनलाई स्पष्टीकरण नसोध्न आदेश दिएको हो ।
