काठमाडौं । नेपाल आयल निगमले हवाई इन्धनको भाउ घटाएसँगै हवाई यात्राको भाडा पनि घटेको छ । नेपाल नागरिक उड्डयन प्राधिकरण(क्यान)ले हवाई यात्राको भाडादर घटाएको हो ।
घटेको नयाँ भाडादरमा सबैभन्दा धेरै विराटनगर–नेपालगञ्ज रुटको भाडा पाँच सय ४० रुपैयाँले घटेको क्यानका प्रवक्ता जगन्नाथ निरौलाले जानकारी दिएका छन् । उनका अनुसार सबैभन्दा कम भने काठमाडौँ–सिमराको भाडा ९० रुपैयाँले घटेको छ ।
त्यस्तै, काठमाडौँ–भद्रपुरको तीन सय, काठमाडौँ–विराटनगरको दुई सय ४०, काठमाडौँ–धनगढीको चार सय ४५, काठमाडौँ–नेपालगञ्जको तीन सय २५, काठमाडौँ–भैरहवाको दुई सय १० र काठमाडौँ–सुर्खेतको भाडा तीन सय ४५ रुपैयाँले घटेको छ ।
मङ्गलबार नेपाल आयल निगमले हवाई इन्धनको भाउ प्रतिलिटर १० रुपैयाँले कम गरेको थियो ।
