काठमाडौं । वैदेशिक रोजगारीका लागि विदेश पठाईदिने भन्दै रकम ठगी गर्ने दुईजना पक्राउ परेका छन् । सोलुखुम्बु जिल्ला लिपुलेख गाउँपालिका वडा नं १ घर भई काठमाडौं महानगरपालिका स्वयम्भु पाँचधारा बस्ने ४६ वर्षीय शेर बहादुर तामाङ र झापा जिल्ला दमक नगरपालिका वडा नं. १० घर भई हाल बुढानिलकण्ठ बस्ने ४५ वर्षीय मुना देवी कार्की पक्राउ परेका हुन् ।
तामाङले खुम बहादुर रानालाई वैदेशिक रोजगारीको लागि कम्बोडिया पठाइदिने र कम्बोडिया पुगेपछि प्रतिष्ठित कम्पनीमा काम लगाईदिन्छु, मासिक १ लाख ५० हजार बढी तलब हुन्छ भनी विश्वास दिलाई प्रलोभनमा परेरे पिडितबाट पटक पटक गरी ५ लाख रकम लिई सम्पर्कविहीन भएका थिए ।
त्यस्तै, मुना देवी कार्कीले उमेश श्रेष्ठलाई दुबई पठाईदिन्छु त्यसको लागि ४ लाख ५० हजार लाग्छ र दुबई पुगेपछि Bike Rider मा काम लगाइदिन्छु मासिक १ लाख भन्दा धेरै तलव हुन्छ भन्दै प्रलोभनमा पारी निज पीडितबाट पटकपटक गरी ४ लाख ५० हजार ठगी गरेको प्रहरीले जनाएको हो ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलिले तामाङलाई जेठ २३ गते नयाँ बानेश्वरबाट र कार्कीलाई जेठ २२ गते बबरमहलबाट पक्राउ गरेको हो । पक्राउ परेका उनीहरुलाई थप अनुसन्धान तथा आवश्यक कारवाहीका लागि वैदेशिक रोजगार विभाग ताहाचल, काठमाडौं पठाईएको प्रहरीले जनाएको हो ।
