काठमाडौं । वैदेशिक रोजगारीका लागि जापान पठाईदिन्छु भन्दै रकम ठगी गर्ने व्यक्ति पक्राउ परेका छन् । जिल्ला नुवाकोट दुप्चेश्वर गाउँपालिका वडा नं. १ घ्याङफेदी घर भई हाल काठमाडौं जिल्ला गोकर्णेश्वर नगरपालिका वडा नं. ४ मकालबारी बस्ने ५५ वर्षीय सुन बहादुर तामाङ पक्राउ परेका हुन् ।

तामाङले  हिरादेवी थापालाई वैदेशिक रोजगारीको लागि जापान पठाईदिन्छु त्यसको लागि १२ लाख रुपैयाँ लाग्छ, जापान पुगेपछि agriculture मा काम लगाईदिन्छु मासिक १ लाख भन्दा धेरै तलब हुन्छ भनी विश्वास दिलाई प्रलोभनमा पारेर रकम ठगी गरेका थिए ।

पिडितहरुबाट पटक पटक गरी १२ लाख रकम लिई सम्पर्कविहिन भएको प्रहरीले जनाएको हो । काठमाडौं उपत्यका अपराध अनुसन्धान कार्यालयबाट खटिएको प्रहरी टोलिले तामाङलाई आसर ३ गते गोकर्णेश्वर नगरपालिका वडा नं. ४ माकालबारीबाट  पक्राउ गरेको हो ।

पक्राउ परेका उनलाई थप अनुसन्धान तथा कारवाहीका लागि वैदेशिक रोजगार विभाग, ताहाचल काठमाडौं पठाईएको प्रहरीले जनाएको छ ।