">
काठमाडौं । तुलनात्मक रुपमा संगठित मानिने प्रमुख प्रतिपक्ष दल नेकपा एमालेमा पार्टीको सदस्यता नविकरण गर्नेहरु घटेका छन् । एमालेको १०औँ महाधिवेशनयता पार्टीको सदस्याता नविकरण गर्ने कार्यकर्ताभन्दा रवि लामिछाने नेतृत्वको राष्ट्रिय स्वतन्त्र पार्टी (रास्वपा)का नयाँ कार्यकर्ताहरु धेरै भएका हुन् ।
हाल एमालेमा पार्टीको सदस्यता नविकरण गर्ने र नयाँ सदस्यता लिनेको संख्या झण्डै ६० प्रतिशतले घटेको छ । पार्टीको १०औँ महाधिवेशनअघि एमालेले पार्टी सदस्यता ७ लाख ८९ हजार ६ सय २० पुगेको तथ्यांक सार्वजनिक गरेको थियो । तर, महाधिवेशनपछि एमालेले पार्टी सदस्यताका बारेमा कुनै पनि तथ्यांक सार्वजनिक गरेको छैन ।
पार्टी स्रोतका अनुसार २०७८ मंसिरमा चितवनमा भएको दशौँ महाधिवेशनपछि २०८० जेठसम्ममा पार्टीका ३ लाख ५० हजारभन्दा कमले मात्रै सदस्यता नविकरण गरेका छन् । अर्थात, एमालेका ५९ प्रतिशत कार्यकर्ताले पार्टीको सदस्यता नविकरण गराएका छैनन् ।
पार्टीमा नयाँ सदस्यसँगै सदस्याता नविकरण गर्नेहरुको उत्साह घटेको पार्टीकै नेताहरुले बताईरहेको बेला यता रवि लामिछाने नेतृत्वको राष्ट्रिय स्वतन्त्र पार्टी (रास्वपा)मा भने नयाँ सदस्यता लिनेहरुको संख्या ह्वात्तैको छ । संख्यात्मक हिसाबले पनि एमालेमा नविकरण गर्नेको भन्दा रास्पामा नयाँ सदस्यता लिने कार्यकर्ता बढी देखिएका छन् ।
