काठमाडौं । काठमाडौं महानगरपालिकाले रोकेको शैक्षिक मेला चलाउन उच्च अदालत पाटनले अन्तरिम आदेश दिएको छ ।
नयाँ कलेज खोजिरहेका विद्यार्थीलाई लक्षित गर्दै उच्च माध्यामिक विद्यालय एशोसिएसन (हिसान)ले आयोजना गरेको शैक्षिक मेलामा महानगरले रोक लगाएपछि हिसानले मेयर शाहविरुद्ध उच्च अदालत पाटनमा रिट दर्ता गराएको थियो ।
सोही रिटमाथि सुनुवाई गर्दै न्यायधीश टेकप्रसाद ढुंगाना र रमेश ढकालको इजलासले हिसानको पक्षमा फैसला गर्दै शैक्षिक मेला नरोक्न अन्तरिम आदेश दिएको हो । शैक्षिक मेलाले संघीय सरकारबाट अनुमति लिइसकेको कार्यक्रमका लागि स्थानीय तहको अनुमति नचाहिने आदेशमा उल्लेख गरिएको छ ।
हिसानले जेठ ३२ गतेदेखि काठमाडौंको भृकुटीमण्डपमा ७५ वटा शैक्षिक संस्थाको उपस्थितिमा शैक्षिक मेला सुरु गरेको थियो । तर, एसइईको रिजल्ट नआउँदै विद्यार्थीलाई प्रलोभनमा पार्ने गरी मेला सुरु भएको भन्दै महानगरले उक्त शैक्षिक मेलामा रोक लगाएको थियो ।
