काठमाडौं । देशव्यापी रुपमा हिन्दी फिल्म ‘आदिपुरुष’मा समावेश भएको विवादित डायलगको चर्को आलोचना भईरहेको बेला धनगढीमा रहेको एसटिएस सिनेमा हलले ‘आदिपुरुष’को प्रदर्शनमा रोक लगाएको छ । एसटिएस सिनेमा हलले सोमबारदेखि स्वस्फूर्त रुपमा ‘आदिपुरुष’को प्रदर्शमा रोक लगाउने निर्णय गरेको हो ।
फिल्लमा समावेश भएको ‘जानकी भारतीय छोरी हुन्’ भन्ने डायलगले नेपालको राष्ट्रियता र सांस्कृतिक एकतामाथि प्रहार गरेको भन्दै सोमबारदेखि ‘आदिपुरुष’को सम्पूर्ण शो रोकेको एसटिएस सिनेमा हलका इन्चार्ज योगेन्दै नायकले जानकारी दिएका छन् ।
नायकका अनुसार सोमबार साँझ ५ बजेको ‘शो’का लागि भएको टिकट बुकिङ पनि रद्ध गरिएको छ । योसँगै अब धनगढीको एकमात्र एसटिएस सिनेमा हलमा पनि हिन्दी फिल्म ‘आदिपुरुष’को प्रदर्शनी रोकिएको छ ।
यसअघि काठमाडौं महानगरपालिका, पोखरा महानगरपालिका र धरान उपमहानगरपालिकामा पनि ‘आदिपुरुष’सहित अन्य हिन्दी फिल्मको प्रदर्शनमा रोक लगाईसकिएको छ ।
