काठमाडौं । सडेको मिठाई बेचेको भन्दै काठमाडौं महानगरपालिकाले आकाश फुड्सलाई कार्वाही गरेको छ । बजार अनुगमनका क्रममा लाजिम्पाटस्थित आकाश फुड्सले सेवाग्राहीलाई बेच्ने मिठाई सडेगलेको पाइएपछि महानगरले कार्वाही गरेको हो ।
वडा नम्बर २ स्थित उक्त आकाश फुड्सले बेच्ने गरेको मिठाई सडेगलेको र ढुसी परेको मिठाईं तथा किरा परेको अन्य खाद्य सामग्री बिक्रीवितरण गरेको महानगरको बजार अनुगमन समितिले जनाएको छ । महानगरका अनुसार उक्त फुड्सलाई १ लाख ५० हजार रुपैयाँ जरिवाना गरेको जनाएको छ ।
आकाश फुड्सका सञ्चालक अंकुर अग्रवाल हुन् ।
यसो त काठमाडौं महानरपालिकाले अहिले महानगरभित्र बजार अनुगमनलाई तिव्रता दिएको छ । अधिकांश पसलहरुले उपभोक्ताको स्वास्थ्यमा गम्भीर असर पर्ने, म्याद गुज्रिएका खाध्य पदार्थ बेच्ने गरेको गुनासो पछि महानगरले बजार अनुगमनमा तिव्रता दिएको हो । यसअघि महानगरले अखाध्य वस्तु बेच्ने केक पसललाई कार्वाही गरिसकेको छ ।
