काठमाडौं । वैदेशिक रोजगारीका लागि विभिन्न देश पठाईदिन्छु भन्दै रकम ठगी गर्ने दुई जना पक्राउ परेका छन् । जिल्ला सिन्दुपल्चोक त्रिपुरासुन्दरी गाउँपालिका वडा नं. ५ घर भई हाल काठमाडौं महानगरपालिका वडा नं. ३२ कोटेश्वर बस्ने ३२ वर्षीय प्रकाश श्रेष्ठ र सुनसरी जिल्ला बराहक्षेत्री नगरपालिका वडा नं ७ घर भई हाल भक्तपुर जिल्ला सुर्यविनायक बस्ने ३१ वर्षीय मौसम मग्राती पक्राउ परेका हुन् ।
उनीहरुले विभिन्न व्यक्तिहरुलाई वैदेशिक रोजगारीका लागि विदेश पठाईदिने भन्दै रकम ठगी गरेका थिए । कोटेश्वर बस्ने प्रकाश श्रेष्ठले योगेन्द्र बहादुर साउदलाई पोल्याण्ड पठाईदिन्छु र पोल्याण्ड पुगेपछि प्रतिष्ठित कम्पनीमा काम लगाइदिन्छु, मासिक २ लाख तलब हुन्छ भन्दै विश्वास दिलाई प्रलोभनमा परेर पिडितबाट ८ लाख रुपैयाँ ठगी गरेका थिए ।
त्यस्तै, सुर्यविनायक बस्ने मौसम मग्रातीले टोकमान गुरुङलाई वैदेशिक रोजगारीको लागि माल्टा पठाईदिन्छु, आकर्षक तलब हुन्छ भनी विश्वास दिलाई प्रलोभनमा पारी रकम ठगी गरेको प्रहरीले जनाएको छ ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलिले श्रेष्ठलाई साउन ९ गते जोरपाटी नारायणटारबाट र मग्रातीलाई साउन १० गते काँडाघारीबाट पक्राउ गरेको हो । पक्राउ परेका उनीहरुलाई थप अनुसन्धान तथा कारवाहीका लागि वैदेशिक रोजगार विभाग ताहाचल पठाईएको प्रहरीले जनाएको छ ।
