काठमाडौं । काठमाडौं महानगरपालिकाले हनुमानढोका परिसरभित्र सवारीसाधन निषेध गरेको छ । प्राचीन सम्पदाको मौलिकता र सौन्दर्यतालाई जोगाउनका लागि महानगरले बसन्तपुरको हनुमानढोका परिसरसभित्र सवारी साधन प्रवेशमा रोक लगाएको हो ।
महानगरपालिकाले न्युरोडको शालिक गेटदेखि वसन्तपुर क्षेत्रमा सवारीसाधन निषेध गरेको महानगरीय प्रहरी बल काठमाडौंका हनुमान ढोका इन्चार्ज ध्रुव भुजेलले बताए । सोमवारबाट नै सम्पदा क्षेत्रमा
सवारीसाधन निषेध गरिएको र बुधवार मेयर बालेन्द्र साह र सम्पदा क्षेत्रका अधिकारीहरुसँग बैठक बसी थप निर्णय गरिने भुजेलको भनाई छ । सम्पदा क्षेत्रमा जानेहरुका लागि न्युरोड, विशाल बजार र अन्य बाहिरी क्षेत्रमा पार्किङ गर्नुपर्ने भुजेलले बताएका छन् ।
त्यस्तै, अर्का महानगर प्रहरी ध्रुव सिंह थापाले एम्बुलेन्स र दमकल बाहेकका सवारी साधन सम्पदा क्षेत्रमा प्रवेश नदिएको बताए । ‘शालिक गेटदेखि यता सम्पदा क्षेत्रभित्र चाहिँ प्रवेश निषेध गरिएको छ ।’, उनले भने, ‘सम्पूर्ण गाडीहरु, एम्बुलेन्स, दमकल र पानीको गाडी बाहेक अरु सबै गाडीलाई हिजोदेखि नै बन्द गरिसकिएको छ ।’
नगर प्रहरी थापाका अनुसार बुधबार उक्त विषयमा काठमाडौंका मेयर बालेन्द्र शाह र सम्पदा क्षेत्रका अधिकारीबीच थप छलफल हुनेछ ।
