काठमाडौं । सरकारले काठमाडौंमा जग्गाको मूल्य बढाएको छ । चालु आर्थिक वर्ष २०८० ८१ को जग्गाको न्यूनतम मूल्यांकन गर्दै सरकारले जग्गाको मूल्य बढाएको हो ।

आर्थिक मन्दी र कित्ताकाटमा भएको कडाइले घरजग्गा कारोबार सुस्ताएको अवस्थामा सरकारले भने चालु आर्थिक वर्षको मूल्यांकनमार्फत जग्गाको मूल्य बढाएको हो । योसँगै मालपोत कार्यालयले काठमाडौंमा प्रतिआना ६ लाख २५ हजार रुपैयाँसम्म मूल्य बढाएको छ ।

हालसम्म उपत्यकाको साँखु मालपोट कार्यालयले जग्गाको मूल्य १ लाख ८० हजार रुपैयाँसम्म बढाएको छ । मनमैजु मालपोत कार्यालयले जग्गाको मूल्य प्रतिआना डेढ लाख रुपैयाँसम्म बढाउँदा भक्तपुर मालपोत कार्यालयले प्रतिआना ६ लाख २५ हजार र ललितपुर मालपोत कार्यालयले १ लाख रुपैयाँसम्म वृद्धि गरेका छन् ।

त्यस्तै, कलंकी, डिल्लीबजार र टोखा मालपोत कार्यालयले भने जग्गाको पूरानै मूल्यलाई निरन्तरता दिएका छन् । चावहिल र ललितपुर गोटिखेल मालपोत कार्यालयले भने हालसम्म चालु आर्थिक वर्षको जग्गाको न्यूनतम मूल्यांकन सार्वजनिक गरेका छैनन् ।