काठमाडौं । नेपाल राष्ट्र बैंकले आर्थिक वर्ष २०८०/८१ को मौद्रिक नीति आइतबार सार्वजनिक गर्ने भएको छ । मौद्रिक नीतिका लागि राष्ट्र बैंकको आर्थिक अनुसन्धान विभागले सम्पूर्ण तयारी पूरा गरेको राष्ट्र बैंक स्रोतले बताएको छ । राष्ट्र बैंक स्रोतका अनुसार कुनै प्राविधिक त्रुटी नभए मौद्रिक नीति आइतबार मध्याह्नमा सार्वजनिक गरिनेछ ।
यसो त मौद्रिक नीतिको मस्यौदा राष्ट्र बैंकको उच्च व्यवस्थापनले गत शुक्रबार नै पारित गरेको थियो । उक्त मस्यौदामा बैंकिङ प्रणालीमा थुप्रिएको तरलता चलायमान बनाउन, कर्जा लगानी बढाउने मौद्रिक उपाय औँल्याइएको राष्ट्र बैंक स्रोतले बताएको छ ।
त्यस्तै, मौद्रिक नीतिमार्फत केही नीतिगत दर र बैंक दर पनि घटाउने गरी मौद्रिक नीतिको खाका तयार पारिएको स्रोतको दाबी छ ।
केन्द्रीय बैंकको उच्च व्यवस्थापनले पारित गरेर पठाएको मौद्रिक नीति पारित गर्नका लागि आइतबार बिहान ८ बजे राष्ट्र बैंकको सञ्चालक समितिको बैठक बस्दैछ । उक्त बैठकले चालु आर्थिक वर्ष २०८०/८१ का लागि तयार पारिएको मौद्रिक नीतिको मस्यौदा पारित गरेसँगै आइतबार मध्याह्नमा मौद्रिक नीति सार्वजनिक गरिनेछ ।
