काठमाडौं । संयुक्त अरव इमिरेट्सको अबुधावीमा हुने अन्तराष्ट्रिय सौर्य गठबन्धनको क्षेत्रीय समितिको पाँचौं बैठकमा सहभागी हुन ऊर्जा, जलस्रोत तथा सिंचाइ मन्त्री शक्ति बहादुर बस्नेत नेतृत्वको तीन सदस्यीय टोली आइतबार प्रस्थान गरेको छ । उक्त बैठक यहि २४-२६ जुलाई २०२३ मा हुनेछ ।
आई.एस.ए. का सदस्य राष्ट्रहरु,एशिया-प्रशान्त क्षेत्रका देशहरू मध्ये सम्भाव्य सदस्य राष्ट्रहरु, साझेदार संगठनहरुको बैठकमा सहभागिता रहने जनाईएको छ । भारत र फ्रान्सको संयुक्त प्रयासको रूपमा स्थापित अन्तर्राष्ट्रिय सौर्य गठबन्धन (आई.एस.ए)सँग सम्बन्धित करार सम्झौताबाट सदस्य राष्ट्रहरूलाई सौर्य ऊर्जा प्रविधिहरु प्रयोग गरी ऊर्जा पहुँच बढाउन, ऊर्जा सुरक्षा सुनिश्चित गर्न, ऊर्जाको विकासलाई निर्देषित गर्ने र जलवायु परिवर्तन कम गर्न सहयोग प्राप्त गर्न सक्नेछन् ।
नेपालमा नवीकरणीय ऊर्जा क्षेत्रको विकासका लागि अन्तर्राष्ट्रिय क्षेत्रको लगानी एवं आर्थिक तथा प्राविधिक सहयोग प्राप्त गर्न यस गठबन्धनबाट मद्दत पुग्ने बताइएको छ ।
