काठमाडौं । १ क्विन्टल सुन तस्करी प्रकरणमा पक्राउ परेका दावा छिरिङले तस्करीमा संलग्न चिनियाँ गिरोहलाई नेपाल भित्र्याएको पाइएको छ ।
ठमेलस्थित भियाना होटलका संचालक समेत रहेका दावाले विगत लामो समयदेखि चिनियाँ गिरोहलाई नेपाल भित्र्याउँदै आएको पाइएको हो । दावालाई राजस्व अनुसन्धान विभागको टोलीले आइतबार उनकै होटलबाट पक्राउ गरेको हो ।
विभाग स्रोतका अनुसार नेपालमा यसअघि चिनियाँ नागरिक संलग्न भएर हुने गरेका अधिकांश अपराधमा उनको संलग्नता पुष्टी भएको छ । ‘चिनियाँ गिरोहलाई नेपालमा भित्र्याउने काममा दावाको भूमिका देखिएको छ ।’, स्रोतले भन्यो, ‘चिनियाँ नागरिक जोडिएर भएका अनलाइन ठगी, अनलाइन जुवा, ब्ल्याकमेलिङ लगायतका अपरधामा दावाको कनेक्सन फेला परेका छौँ । थप अनुसन्धान गर्दैछौँ ।’
काभ्रेबाट नेपाली नागरिकता लिएका दावासँग नेपाल र बेल्जियम दुवै देशको नागरिकता रहेको समेत पाइएको छ । हाल पक्राउ परेका दावाको नेकपा माओवादीका शीर्ष नेताहरुसँग राम्रो सम्बन्ध रहेको समेत पाइएको छ ।
