काठमाडौं । जिल्ला प्रशासन कार्यालय अछाममा कर्मचारी अभावका कारण सेवा प्रवाहमा समस्या भएको छ । प्रशासन कार्यालयमा सहायक प्रमुख जिल्ला अधिकारी र प्रशासकीय अधिकृतको अभावमा सेवा प्रवाहमा समस्या देखिएको हो ।
कार्यालयमा लामो समयदेखि सहायक प्रमुख जिल्ला अधिकारी नहुँदा सेवा प्रवाहका कठिनाई भएको प्रमुख जिल्ला अधिकारी (सिडिओ) शरद कुमार पोखरेलले बताएका छन् । अहिले हामीकहाँ जिल्ला र इलाका गरी दुईवटा प्रशासन कार्यालय छन् । तर, हाल इलाका प्रशासन कार्यालय सञ्चालनमा छैन ।’, उनले भने, ‘जिल्ला प्रशासन कार्यालयमा पनि अहिले सहयक सिडिओ र अधिकृतहरु छैनन् । कर्मचारी सरुवा भएर जाने तर नआउने भएका कारण अहिले सेवा प्रवाहमा समस्या छ ।’
दुईवटा प्रशासकीय अधिकृतको दरबन्दी भएको कार्यालयान जेठ १ गते प्रशासकीय अधिकृत मीनराज आचार्यको सरुवा भएपछि काजमा आएका दैलेख जिल्ला प्रशासन कार्यालयका प्रशासकीय अधिकृत भूपेन्द्र थापा गत जेठ २८ देखि असार ८ गतेसम्म काम गरेर फर्किएका थिए । त्यसपछि बाजुरा जिल्ला प्रशासन कार्यालयका प्रशासकीय अधिकृत रामकुमार तिमिल्सेनाले गत असार १० देखि साउन १ गतेसम्म काजमा आएर काम गरी बाजुरा फर्केपछि डोटी जिल्लाका सहायक प्रमुख जिल्ला अधिकारी दीर्घराज उपाध्यायले साउन ३ गतेदेखि काजमा आएर काम गरिरहेका छन् ।
कार्यालयमा २२ कर्मचारीको दरबन्दीमध्ये नौ वटा पद रिक्त छन् । दरबन्दीअनुसार एक सहायक प्रमुख जिल्ला अधिकारी र दुई प्रशासकीय अधिकृत हुनुपर्ने भए पनि कार्यालय सहायक प्रमुख जिल्ला अधिकारी र प्रशासकीय अधिकृतविहीन हुन पुगेका छन् । त्यस्तै, पाँच नायबसुब्बाको दरबन्दीमा एक जनामात्रै छन् भने तीन खरिदारको दरबन्दीमा दुई र दरबन्दीका दुई कम्प्युटर अपरेटरले करारमा काम गरिरहेका छन् ।
यसअघि दुई प्रशासकीय अधिकृतमध्ये एक दिपेश रिजालको गत २०७९ माघ ४ गते र मीनराज आचार्यको यही जेठ १ गते सरुवा भएको थियो । असार २४ गते गृह मन्त्रालयले प्रशासकीय अधिकृत रामप्रसाद शर्मा र यादव भण्डारीलाई उक्त कार्यालयमा सरुवा गरेकामा दुबैजना सरुवा भएको महिनौँ पुग्दासमेत हाजिर हुन आएका छैनन् । कर्मचारी अभावले दैनिक कामकाजमा समस्या हुँदै आएको प्रमुख जिल्ला अधिकारी पोखरलले बताएका छन् ।
‘कार्यालयमा दरबन्दी अनुसारको कर्मचारी अभाव छ । आफै बिहानदेखि बेलुकासम्म खटेको छु । सेवा प्रवाहमा साह्रै समस्या छ ।’, सिडिओ पोखरलले भने, ‘सरुवा भएर पनि कर्मचारी आउने नमान्ने अवस्था छ ।’
