काठमाडौं । चीनबाट उपराष्ट्रपति रामसहायप्रसाद यादव स्वदेश फर्किने भएपछि त्रिभुवन अन्तराष्ट्रिय विमानस्थल बन्द गरिएको छ । सोमबार उपराष्ट्रपति यादव नेपाल फर्किने तालिकाअनुसार सोमबार दिउँसो २ बजेदेखि नै विमानस्थल बन्द गरिएको हो ।

उपराष्ट्रपति यादवको स्वदेश फर्किने तालिकाअनुसार दिउँसो ३ः२० देखि ३ः५० सम्म विमानस्थल बन्द गर्ने सेड्युल भए पनि सेड्युलभन्दा ४५ मिनेटअघिदेखि नै विमानस्थल बन्द गरिएको छ । तर, पूर्वनिर्धारित तालिका भन्दा अघि नै उपराष्ट्रपति यादव स्वदेश फर्किने भएपछि विमानस्थल बन्द गरिएको हो ।

सोमबार विमानस्थल अघोषित रुपमा बन्द भएपछि यात्रुहरु मर्कामा परेका छन् । यता एयरलाइन्स कम्पनीहरुले पनि तालिका भन्दा अघि नै विमानस्थल बन्द गर्ने निर्णयबारे कुनै पनि जानकारी नभएको दाबी गरेका छन् । विमानस्थल बन्द गर्नुअघि सूचना जारी गर्नुपर्ने भए पनि सोमबार अघोषित रुपमा विमानस्थल बन्द गरिएको हो ।

अब उपराष्ट्रपति यादव त्रिभुवन विमानस्थलमा अवतरण गरेपछि मात्रै विमानस्थल सञ्चालन हुनेछ । उपराष्ट्रपति यादव  कुनमिङमा आयोजना भएको सातौं चीन–दक्षिण एसिया एक्स्पो तथा २७ औं चीन आयात–निर्यात एस्क्पोमा सहभागी भएका थिए ।