काठमाडौं । सरकारले सार्वजनिक यातायातको भाडा बढाएको छ । नेपाल आयल निगमले पेट्रोलियम पदार्थको मुल्य वृद्धि गरेसँगै यातायात व्यवस्था विभागले अन्तर प्रदेश सार्वजनिक यात्रुबाहक र मालवाहक सवारीको भाढा बढाएको हो ।

विभागले तोकेको नयाँ भाडादरअनुसार यात्रुबाहक सवारी साधनको भाडा ४.७० प्रतिशतले बढेको छ । त्यस्तै, पहाडी रुटमा चल्ने मालबाहक सवारी साधनको भाडा ६.१५ प्रतिशत र तराईको बाटोमा चल्ने मालबाहक सवारी सधानको भाडा ६.८३ प्रतिशतले बढेको छ ।

विभागले बढाएको नयाँ भाडादर बुधबारबाटै लागु भएको छ । पछिल्लो साउन महिनामा मात्रै निगमले डिजेलको मूल्य पटकपटक गरी प्रतिलिटरमा २१ रुपैयाँ वृद्धि गरेको छ । सोही अनुसार स्वचालित प्रणाली अनुसार सार्वजनिक यातायातको भाडा बढाउने निर्ण गरेको विभागले जनाएको छ ।

मंगलबारमात्रै नेपाल आयल निगमले पेट्रोल प्रतिलिटर ५ र डिजेल र मट्टितेल प्रतिलिटर १४ रुपैयाँले बढाएको छ ।