काठमाडौं । नेपाल चेम्बर अफ कमर्सले नेपालमा लगानीका लागि पहल गर्न जापानी सांसदलाई आग्रह गरेको छ । चेम्बरको टोलीले नेपाल भ्रमणमा रहेका सांसदद्वय कोबायाशी काजुहिरो र नागइ मान्बुसँगको भेटमा नेपाल र जापानबीचको कूटनीतिक र आर्थिक सम्बन्ध ऐतिहासिक रहेकाले नेपालमा लगानीका लागि पहल गर्न जापानी सांसदलाई आग्रह गरेको हो ।

भेटमा चेम्बरका अध्यक्ष राजेन्द्र मल्लले जापानसँग नेपालको सम्बन्ध आर्थिक तथा व्यापारिक दृष्टिकोणले ऐतिहासिक रहेको बताएका छन् । ‘दुई मुलुकबीचको कूटनीतिक सम्बन्ध ७० वर्ष पुग्न लागेको छ ।’, उनले भने, ‘लगानी वृद्धि र व्यापारिक साझेदारीमार्फत आपसी सहकार्यलाई थप बलियो बनाउन आवश्यक छ ।’

अध्यक्ष मल्लले नेपालको जलविद्युत्, पूर्वाधार, पर्यटन एवं प्रविधिको क्षेत्रमा लगानीको वातावरण बनाउन जापानका सांसदलाई आग्रह गरेका छन् । कृषिमा प्रविधि हस्तान्तरण हुन सके नेपालले लाभ प्राप्त गर्नसक्ने उनको भनाई रहेको थियो ।

स्वागत कार्यक्रममा जापानी सांसद काजुहिरोले नेपालमा ३० वर्ष अगाडि आएर लुम्बिनीमा वृक्षरोपण गरेको स्मरण गरेका थिए । नेपाल जापानबीचको आर्थिक र कूटनीतिक सम्बन्ध सधैँ उत्कृष्ट रहेको उनको भनाइ छ । अर्का सांसद मान्बुले दुई मुलुकबीचको आर्थिक र कूटनीतिक सम्बन्धलाई जनस्तरसम्मै पुर्याउनुपर्ने बताएका छन् ।