काठमाडौं । नेपलामा सक्रिय चिनियाँ अपराधी टोलीले नेपालीलाई अमानवीय कामका लागि विदेशमा बेच्ने गरेको पाइएको छ । ठमेलस्थित चिनियाँ नागरिकले चलाएको वाईवाईपी नामक कम्पनीले नेपालीलाई राम्रो जागिरको प्रलोभन देखाएर विदेशमा बेच्ने गरेको पाइएको हो ।
यसो त नेपालीलाई वैदेशिक रोजगारीका नाममा लुट्ने र ठग्ने प्रवित्ति नौलो होइन । तर, पछिल्लो समय चिनियाँ गिरोहहरुले नेपाली चेलीहरुलाई थाइल्याण्डमा ‘कम्प्युटर टाईप’को काममा लगाउने भन्दै म्यानमार पुर्याएर अश्लिल र आपराधिक काम गर्न बाध्य बनाउने गरेको पाइएको छ ।
यतिसम्म कि उनीहरुले भनेअनुसारको काम नगरे शारिरिक तथा मानसिक यातना दिने गरेको समेत पाइएको छ । यसरी काठमाडौंमा बसेर नेपाली चेलीहरुलाई म्यानमारमा पठाउने चिनियाँ अपराधी टोलीले उनीहरुलाई ‘अनलाइन स्क्याम’को धन्दामा लगाउने र भिडियो कलमै निर्वस्त्र हुन बाध्य बनाउने गरेको समेत पाइएको छ ।
यसरी पटकपटक यातना दिने क्रम नरोकिएपछि पीडितले दिएको जाहेरीका आधारमा मानव बेचबिखन नियन्त्रण ब्यूरोले काठमाडौंको बिजेश्वरीमा डेरा गरी बस्ने ४२ वर्षीय चिनियाँ नागरिक जोनसोन भन्ने लियाङ जुनलाई पक्राउ गरिसकेको छ । ब्यूरोका प्रमुख एसएसपी जीवन श्रेष्ठका अनुसार हालसम्म सोही प्रकृतिका २२ जना पीडितले ब्यूरोमा उजुरी दिएका छन् । हाल चिनियाँ गिरोहले थाइल्याण्ड भन्दै म्यानमारमा लगेर करिब २०० जनालाई बन्धक बनाएको अनुमान गरिएको छ ।
त्यस्तै, नेपालीलाई म्यानमार पुर्याएर ‘अनलाइन स्क्यामिङ’को काममा लगाउने सुनिता नेपालीलाई पनि प्रहरीले पक्राउ गरेको छ । हाल पक्राउ परेका चिनियाँ नागरिक जोनसोनसहितको चिनियाँ अपराधीहरुको टोलीमाथि अनुसन्धान भईरहेको ब्यूरोले जनाएको छ ।
