काठमाडौं । पोल्याण्ड पठाईदिन्छु भन्दै रकम ठगी गर्ने व्यक्ति पक्राउ परेका छन् । पाल्पा जिल्ला तिनाउँ गाउँपालिका वडा नं. ६ घर भई हाल काठमाडौं जिल्ला गोकर्णेश्वर नगरपालिका वडा नं. ६ नयाँबस्ती बस्ने ४५ वर्षीय पुरण अस्लामी पक्राउ परेका हुन् ।

उनले धनन्जय चौधरीलाई वैदेशिक रोजगारीका लागि पोल्याण्ड पठाईदिन्छु भन्दै रकम ठगी गरी सम्पर्क विहिन भएका थिए । उनले पोल्याण्ड पठाईदिने र पोल्याण्ड पुगेपछि होटलमा काम लगाईदिन्छु, आकर्षक तलब हुन्छ भनी विश्वास दिलाई प्रलोभनमा पारेर पिडितबाट पटक पटक गरी १ लाख २० हजार रुपैयाँ ठगी गरेका थिए ।

काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनलाई साउन १६ गते गोकर्णेश्वर, नयाँबस्तीबाट पक्राउ गरेको हो । पक्राउ परेका अस्लामीलाई थप अनुसन्धान तथा कारवाहीका लागि वैदेशिक रोजगार विभाग ताहाचल, पठाईएको प्रहरीले जनाएको छ ।