काठमाडौं । वैदेशिक रोजगारीका लागि ईटाली पठाईदिने भन्दै रकम ठगी गर्ने व्यक्ति पक्राउ परेका छन् । कालिकोट जिल्ला तिलागुफा नगरपालिका वडा नं. ३ घर भई हाल काठमाडौं जिल्ला किर्तिपुर नगरपालिका वडा नं. ५ बस्ने बिष्णु ऋषि पाण्डे पक्राउ परेका हुन् ।
उनले तिर्थ बहादुर थापालाई वैदेशिक रोजगारीका लागि ईटाली पठाईदिने र ईटाली पुगेपछि पेट्रोल पम्पमा काम लगाईदिने, मासिक एक लाख बढी तलब हुन्छ भनी विश्वास दिलाई प्रलोभनमा पारेर रकम ठगी गरेका थिए ।
उनले पिडितबाट पटक पटक गरी ४ लाख २५ हजार रुपैयाँ लिई सम्पर्क विहिन भएका थिए । काठमाडौं उपत्यका अपराध अनुसन्धान कार्यलयबाट खटिएको प्रहरी टोलीले उनलाई भदौ ५ गते किर्तिपुरबाट पक्राउ गरेको हो । पक्राउ परेका उनलाई थप अनुसन्धान तथा कारवाहीका लागि वैदेशिक रोजगार विभाग पठाईएको प्रहरीले जनाएको छ ।
