काठमाडौं । सरकारी वकिलको कार्यालयले सुन तस्करी प्रकरणमा नाम मुछिएका माओवादी उपाध्यक्ष कृष्णबहादुर महरा र उनका छोरामाथि छानविन गर्न निर्देशन दिएको छ । विद्युतीय चुरोट (भेप)मा लुकाएर सुन तस्करी गर्ने गिरोहको सम्पर्कमा देखिएका महरा र उनका छोरामाथि छानबिन गर्न निर्देशन दिएको हो ।

सुन तस्करी प्रकरणको अनुसन्धानका क्रममा २०७९ पुस १० मा दुबईबाट ‘भेप’मा लुकाएर सुन ल्याउने समूहका चिनियाँ नागरिक दाओजिन वाङसँग महरा र उनका छोराहरूको सम्पर्क देखिएको थियो ।

प्रहरीको केन्द्रीय अनुसन्धान ब्यूरो (सीआईबी)ले पनि महरा र उनका छोरा राहुललाई सुन ल्याउने समूहका ‘मुख्य योजनाकार’ किटान गरेर सरकारी वकिलको कार्यालयमा अनुसन्धान प्रतिवेदन बुझाएको थियो । अनुसन्धान प्रतिवेदनमा ‘मुख्य योजनाकार’ किटान गरेर बयान समेत नगराएको भन्दै जिल्ला सरकारी वकिल कार्यालयले उनीहरूमाथि अनुसन्धान गर्न प्रहरीलाई निर्देशन दिएको छ ।

योसँगै प्रकरणमा नाम मुछिएका महरा र उनका छोरा राहुलमाथि पनि छानविन गर्ने तयारी गरिएको छ ।