काठमाडौं । महालेखा परीक्षक बन्नका लागि १६ जनाले आवेदन दिएका छन् । महालेखापरीक्षकको ६ वर्षे कार्यकालबाट टंकमणी शर्मा (दंगाल)ले अनिवार्य अवकाश पाएपछि रिक्त पदका लागि दुई सिएसहित १६ जनाले आवेदन दिएका हुन् ।
महालेखा परीक्षकका लागि आवेदन दिनेमा महालेखा परीक्षक कार्यालयका कार्यवाहक महालेखापरीक्षक महेश्वर काफ्ले, उपमहालेखापरीक्षक वामदेव शर्मा, नायव महालेखापरीक्षक चन्द्रकान्त भण्डारी र वैकुण्ठ बहादुर अधिकारी रहेका छन् ।
त्यस्तै, उपमहालेखापरीक्षक राममाया कुँवर र पूर्व नायव महालेखापरीक्षक अशोक कार्कीले पनि महालेखा परीक्षकका लागि आवेदन दिएका छन् । यस्तै राष्ट्रिय तथ्यांक कार्यालयका प्रमुख समेत रहेका बहालवाला सचित तोयम रायले पनि महालेखा परीक्षकका लागि आवेदन दिएका छन् । त्यस्तै, पूर्व सचिव गोपीनाथ मैनाली, रामशरण पुडासैनी, हरि बस्याल, रामप्रसाद थपलिया, शिशिरकुमार ढुंगाना, शंकर खरेल, सिए सुबोधकुमार कर्ण र सिए हरि सिलवालले पनि आवेदन दिएका छन् ।
