काठमाडौं । जिल्ला मालपोत कार्यालय तनहुँले आर्थिक वर्ष २०७९/८० मा ३० करोड ८४ लाख ३ हजार ५४ रुपैयाँ राजस्व संकलन गरेको छ । आर्थिक वर्ष २०७८/७९ को तुलनामा गत आर्थिक वर्षमा १३ करोड ८३ लाख ७४ हजार छ सय १० कम राजस्व संकलन भएको सो कार्यालयले जनाएको छ । आर्थिक वर्ष २०७८/७९ मा ४४ करोड ६८ लाख चार हजार छ सय ६४ रुपैयाँ राजस्व संकलन भएको कार्यालयका सुब्बा एवं सूचना अधिकारी टीकाराम शर्मा घोरासाइनेले जानकारी दिएका हुन् ।
आर्थिक वर्ष २०७९/८० मा रजिस्ष्ट्रेशन दस्तुरबाट १५ करोड ८० लाख पाँच हजार चार सय १७ रुपैयाँ, पुँजीगत लाभकर ११ करोड ३९ लाख ५७ हजार १५ रुपैयाँ, रोक्का दस्तुर धितोसमेत गरी ३ करोड १८ लाख ७० हजार रुपैयाँ राजस्व संकलन भएको थियो ।
त्यसैगरी, नामसारी संशोधनबाट ६२ लाख ६८ हजार ८ सय १७, अन्य सेवाशुल्क र प्रशासनिक दस्तुर ११ हजार ८ सय ५ रुपैयाँ राजस्व सङ्कलन भएको थियो । उनका अनुसार अघिल्लो आर्थिक वर्षको तुलनामा कित्ताकाट रोकिएका कारण कारोबार घटेको थियो ।
सङ्कलित राजस्वमध्ये पुँजीगत लाभकर राजस्वबापत सङ्कलन भएको ११ करोड ३९ लाख ५७ हजार १५ सङ्घीय सरकारको खातामा पठाइने कार्यालय प्रमुख चिरञ्जीवी पौडेलले जानकारी दिए । बाँकी रहेको राजस्व रकममध्ये ६० प्रतिशत स्थानीय पालिका र ४० प्रतिशत गण्डकी प्रदेश सरकारको खातामा पठाइने उनको भनाइ थियो ।
