काठमाडौं । माण्डु हाईड्रोपावर लिमिटेडले वैदेशिक रोजगारीमा गएका व्यक्तिहरुमा निष्काशीत सेयर बाँडफाँड गरेको छ । नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा बसी रोजगार गरिरहेका नेपालीहरुको लागि निष्काशन गरिएको १ लाख ३६ हजार ३ सय ६४ कित्ता सेयर बाँडफाँड गरेको हो ।
कम्पनीको धितोपत्र निष्काशन तथा बिक्री प्रबन्धक प्रभु क्यापिटल लिमिटेडको कार्यालय, कमलादीमा बाँडफाँड सम्पन्न भएको हो । उक्त सेयरमा १० कित्ता देखि १५ सय कित्तासम्म आवेदन दिने १३ हजार ६ सय ३६ आवेदकहरुलाई १० कित्ता, र २० कित्ता देखि १५ सय कित्तासम्म आवेदन दिने ५ हजार ६ सय ६५ जना मध्ये गोलाप्रथाबाट ४ जनालाई थप ४ कित्ता गरी १ लाख ३६ हजार ३ सय ६४ कित्ता सेयर बाँडफाँड भएको हो ।
बाँडफाँडको नतिजा प्रभु क्यापिटलको वेवसाइट https://results.prabhucapital.com तथा सिडिएससिको वेवसाइट https://iporesult.cdsc.com.np बाट हेर्न सकिने व्यवस्था मिलाईएको छ ।
