काठमाडौं । नेदरल्याण्ड पठाइदिन्छु भन्दै रकम ठगी गर्ने व्यक्ति पक्राउ परेका छन् । जिल्ला महोत्तरी जलेश्वर नगरपालिका वडा नं. १३ स्थाई घर भई हाल काठमाडौं महानगरपालिका वडा नं. ३१ शान्तिनगर बस्ने ३७ वर्षीय कपिल बर्मा पक्राउ परेका हुन् ।
उनले बिक्रम कार्की सहित ६ जनालाई वैदेशिक रोजगारीका लागि नेदरल्याण्ड पठाईदिन्छु त्यसको लागि प्रतिव्यक्ति १२ लाख रुपैयाँ लाग्ने र नेदरल्याण्ड पुगेपछि प्रतिष्ठित सुपरमार्केट कम्पनीमा स्टोरकिपरको काम लगाइदिन्छु मासिक २ लाख बढी तलब हुन्छ भनी विश्वास दिलाई प्रलोभनमा परेर रकम ठगी गरेका थिए ।
उनले पीडितहरूबाट पटकपटक गरी ४४ लाख ५० हजार रुपैयाँ लिई सम्पर्क विहिन भएको प्रहरीले जनाएको छ । काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनलाई साउन १५ गते मण्डिखाटारबाट पक्राउ गरेको हो ।
पक्राउ परेका बर्मालाई थप अनुसन्धान तथा कारवाहीका लागि वैदेशिक रोजगार विभाग ताहाचल पठाईएको प्रहरीले जनाएको छ ।
