काठमाडौं । भारतबाट पेट्रोल र डिजेलको मूल्य बढेर आएको छ । भारतीय आयल कर्पोरेशन (आईओसी)ले पठाएको नयाँ मूल्यसूचीअनुसार पेट्रोल ७ रुपैयाँ ७८ पैसा र डिजेलको मूल्य ६ रुपैयाँ ६१ पैसा बढेर आएको हो ।

मंगलबार प्राप्त भएको नयाँ मूल्यसूचीअनुसार पेट्रोल र डिजेलको मूल्य बढेर आएको नेपाल आयल निगमले जनाएको छ । पेट्रोल र डिजेलको मूल्य बढे पनि खाना पकाउने एलपी ग्याँसको मूल्य भने प्रतिसिलिण्डर करिब १ सय रुपैयाँले घटेर आएको निगमले जनाएको छ ।

निगमका अनुसार आईओसीले हरेक १५–१५ दिनमा पठाउने नयाँ मूल्यसूची अनुसार नै नेपालमा स्वचालित मूल्य प्रणालीबाट मूल्य समायोजन हुनेछ । भारतबाट पेट्रोल र डिजेलको मूल्य बढेर आउँदा नेपालमा पनि मूल्य बढ्ने र ग्याँसको मूल्य घटेर आएकोले नेपालमा पनि ग्याँसको मूल्य घट्ने निगमले जनाएको छ ।

पछिल्लो केही दिनयता अन्तराष्ट्रिय बजारमा कच्चा तेलको भाउ बढिरहेकोले भारतमा आउने प्रशोधित तेलको मूल्य समेत बढेको हो ।