काठमाडौं । प्रभु बैंकले गत आर्थिक वर्षको चौथो त्रैमासको अपरिस्कृत वित्तीय विवरण सार्वजनिक गरेको छ । बैंकले सार्वजनिक गरेको विवरण अनुसार बैंकले गत आर्थिक वर्षको अन्त्यसम्ममा २ अर्ब ८२ करोड ५२ लाख ४९ हजार रुपैयाँ खुद नाफा कमाएको छ । जुन अघिल्लो आर्थिक वर्षको सोही अवधिको तुलनामा ४८.५४ प्रतिशतले बढी हो ।

समीक्षा अवधिमा बैंकको खुद ब्याज आम्दानीमा उल्लेख्य सुधार हुँदा खुद नाफा बढ्न पुगेको हो । यसअवधिमा बैंकको खुद ब्याज आम्दानी ७८.६२ प्रतिशतले बढेर १० अर्ब २५ करोड रुपैयाँ नाघेको छ । यद्दपि, बैंकलाई खराब व्यवस्थापन चुनौतीपूर्ण देखिएको छ । अघिल्लो वर्ष १.८६ प्रतिशत रहेको खराब कर्जा बढेर असार मसान्तसम्ममा ४.१६ प्रतिशत पुगेको छ ।

खराब कर्जाको व्यवस्थापनलाई बैंकले उच्च प्राथमिकतामा राखेको चौथो त्रैमासिक वित्तीय विवरणमा उल्लेख गरेको छ । गत वर्ष सेन्चुरी बैंकलाई एक्वायर गरेपछि प्रभु बैंकको चुक्ता पुँजी २३ अर्ब बढी पुगेको छ । समीक्षा अवधिमा बैंकको रिजर्भ कोष ८५.३६ प्रतिशतले बढेर १० अर्ब रुपैयाँ नाघेको छ ।

समीक्षा अवधिमा बैंकको प्रतिसेयर आम्दानी (ईपीएस) २ रुपैयाँ ९७ पैसा घटेर १२ रुपैयाँमा सीमित भएको छ । असार मसान्तसम्ममा बैंकको मूल्य आम्दानी अनुपात १३.३३ गुणा रहेको छ भने प्रतिशेयर नेटवर्थ १४३ रुपैयाँ २५ पैसा रहेको छ । समीक्षा अवधिमा बैंकको निक्षेप ६१.८२ प्रतिशत बढेको छ भने कर्जा लगानी ६३.८५ प्रतिशत बढेको छ ।