काठमाडौं । नेपाली कांग्रेसका सांसद प्रदीप पौडेलले त्रिभूवन विश्वविद्यालय अन्तर्गत ईन्जिनियरिङ कलेजको शुल्क बढाउने निर्णय फिर्ता लिन सरकारसंग माग गरेका छन् ।
बिहीबार बसेको प्रतिनिधिसभा बैठकको शुन्य समयमा बोल्दै सांसद पौडेलले ईन्जिनियरिङ शिक्षामा गुणस्तरीयता कायम गरेर संचालन हुँदै आएको अध्ययन संस्थानमा मूल्य वृद्धि हुनु अस्वाभाविक भएको बताएका छन् ।
‘त्रिभूवन विश्वविद्यालय अन्तर्गत ईन्जिनियरीङ कलेज आन्दालित भएको छ । त्यहाँ झण्डै २ सय प्रतिशत शुल्क वृद्धि गरिएको छ ।’, सांसद पौडेलले भने, ‘ईन्जिनियरिङ शिक्षामा गुणस्तरीयता कायम गरेको र सामान्य जनताको पहुँच हुने स्थितिमा संचालन हुँदै आएको अध्ययन संस्थानमा जुन ढङ्गबाट मूल्य वृद्धि भएको छ त्यो अस्वाभाविक छ । तत्काल शुल्क वृद्धिको निर्णय फिर्ता लिईयोस् ।’
त्यस्तै, उनले त्रिभूवन विश्वविद्यालय अत्यन्तै भद्रगोल तरिकाले चलिरहेको उल्लेख गर्दै त्यसलाई सुधार गर्न शिक्षा मन्त्रालयलाई आह्वान समेत गरेका छन् ।
