काठमाडौं । गत आर्थिक वर्षमा सोल्टी होटलले ५४ करोड रुपैयाँ खुद नाफा कमाएको छ । होटलले गत आर्थिक वर्षको चौथो त्रैमासको वित्तीय विवरण सार्वजनिक गर्दै अघिल्लो आर्थिक वर्षको तुलनामा ८३.४० प्रतिशत अर्थात ५४ करोड ५१ लाख रुपैयाँ नाफा कमाएको जनाएको हो । होटलले अघिल्लो आर्थिक वर्षको सोही अवधिमा २९ करोड ७२ लाख रुपैयाँ खुद नाफा आर्जन गरेको थियो ।
होटलले समीक्षा अवधिमा कुल २ अर्ब २४ करोड रुपैयाँ आम्दानी गरेको छ । अघिल्लो आर्थिक वर्षको सोही अवधिमा सोल्टी होटलले व्यवसायबाट १ अर्ब ३६ करोड रुपैयाँ आम्दानी गरेको थियो । जुन गत आर्थिक वर्षको तुलनामा ६४.२७ प्रतिशतले कम हो । कोभिड १९ को महामारीपछि पर्यटन व्यवसाय फस्टाएपछि सोल्टी होटलको सञ्चालन आम्दानीमा उल्लेख्य वृद्धि हुँदा नाफा बढ्न पुगेको हो ।
आम्दानी बढेसँगै सोल्टी होटलको सञ्चालन नाफा पनि बढेको छ । यसअवधिमा होटलले ६८ करोड ४० लाख रुपैयाँ सञ्चालन नाफा गरेको छ । गत वर्ष यसले ३३ करोड ३७ लाख रुपैयाँ सञ्चालन नाफा गरेको थियो । नाफासँगै गत आर्थिक वर्षको असार मसान्तमा होटलको प्रतिसेयर आम्दानी (ईपीएस) पनि बढेको छ । यसअवधिमा होटलको ईपीएस ६ रुपैयाँ १६ पैसा पुगेको छ ।
चुक्ता पुँजी ८८ करोड ४७ लाख रुपैयाँ रहेको सोल्टीको रिजर्भ कोषमा १ अर्ब २१ करोड रुपैयाँ छ । त्यस्तै, होटलको प्रतिसेयर नेटवर्थ २३ रुपैयाँ ६८ पैसा रहेको छ ।
