काठमाडौं । काठमाडौं महानगरपालिकाका मेयर बालेन्द्र शाह (बालेन)ले सरकारले जग्गा उपलब्ध गराए काठमाडौं महानगरपालिकाले क्रिकेट स्टेडियम बनाउने बताएका छन् । मंगलबार सामाजिक सञ्जाल फेसबुकमा पोष्ट गर्दै मेयर शाहले यस्तो घोषणा गरेका हुन् ।
मेयर शाहले सरकारद्धारा काठमाडौं महानगर वा आसपासमा आवश्यक सय रोपनी जग्गा उपलब्ध गराए रंगशाला बनाउन पहल गर्ने घोषणा गरेका हुन् ।
‘रंगशाला पनि हाम्रो त्रिविको क्रिकेट स्टेडियम जस्तै थियो, केहि प्याराफिट र अलि बढि सुविधा । नेपालमा त्यहि स्तरको रंगशाला जग्गा बाहेक ८०-९० करोडमा नै बन्छ सायद । यसैले नेपाल सरकारले काठमाण्डौ महानगर वा आसपासमा आवश्यक १०० रोपनी जग्गा उपलब्ध गराउँछ भने काठमाण्डौ महानगरबाट रंगशाला बनाउन हामी पहल गर्नेछौँ ।’, उनले लेखेका छन् ।
त्यस्तै, मेयर शाहले नेपालमा रंगशाला र केही ठूला खेलहरु हुने हो भने देशको खेल विकास हुने बताएका छन् । ठूलो खेल सञ्चालन गर्दा एउटै खेलबाट करोडौँ रकम आर्जन हुन सक्ने बताउँदै मेयर शाहले खेलाडी र तल्लोतहमा सिकाइ सुविधाका लागि अबको ३ वर्षमा सकेसम्म हरेक वडामा एक हुने गरी बलिङ नेट राख्ने प्रबन्ध गरिसकेको समेत जानकारी गराएका छन् ।
