काठमाडौं । वैदेशिक रोजगारीको लागि अल्वानिया पठाईदिन्छु भन्दै रकम ठगी गर्ने एक महिला पक्राउ परेकी छिन् । पक्राउ पर्नेमा झापा जिल्ला बिर्तामोड स्थाई घर भई हाल काठमाडौं सिनामंगल बस्ने २५ वर्षिय सुधा चौधरी रहेकी छिन् ।

चौधरीले उत्तम राजवंशीलाई वैदेशिक रोजगारीको लागि अल्वानिया पठाईदिने प्रलोभनमा पारी दुई लाख ७२ हजार रुपैयाँ ठगी गरेकी हुन् । काठमाडौं उपत्यका अपराध अनुसन्धान कार्यालयबाट खटिएको प्रहरी टोलिले चौधरीको खोजतलास गर्ने क्रममा सिनामंगलबाट पक्राउ गरेको हो ।

पक्राउ परेकी चौधरीलाई थप अनुसन्धान तथा कारवाहीको लागि वैदेशिक रोजगार विभाग ताहाचल पठाईएको प्रहरीले जनाएको छ ।