काठमाडौं । यसअघि अनपब्लिस भएको फेसबुक पेज रुटिन अफ नेपाल बन्द (आरओएनबि) पुनः सुरु भएको छ । सामाजिक सञ्जाल फेसबुकमा चर्चित सञ्चार माध्यम आरओएनबि बिहीबारदेखि सञ्चालनमा आएको हो ।
केही समय अगाडि काठमाडौंका मेयर बालेन्द्र शाह (बालेन)को पुत्रीलाभको खबरको विषयलाई लिएर आलोचना भएपछि सञ्चालक भिक्टर पौडेलले सो पेज नै अनपब्लिस गरेका थिए ।
युवा वर्गमा विश्वासिलो सञ्चारमाध्यमका रुपमा स्थापित भइसकेको आरओएनबि अनपब्लिस भएपछि बजारमा सो पेजका फलोअर्सले दुख मानेका थिए । अधिकांशले रुटिन अफ नेपाल बन्द फिर्ता हुनुपर्ने मागसमेत गरेका थिए ।
सोही अनुसार बिहीबारदेखि रुटिन अफ नेपाल बन्द पेज सञ्चालनमा आएको छ । पेज पुनः सुचारु भए पनि अब भने पेजको नाम परिवर्तन हुने आरओएनबिका एक कर्मचारीले बताएका छन् । ती कर्मचारीका अनुसार केही दिनमा पेजको नाम ‘रुटिन अफ नेपाल’ मात्रै रहनेछ ।
