काठमाडौं । भारतको केन्द्रीय बैंक रिजर्भ बैंक अफ इण्डिया (आरबिआई)का गनर्भर शक्तिकान्त दास विश्वकै उत्कृष्ट गभर्नरको सूचीमा परेका छन् । गभर्नर दासलाई ‘ए प्लस’ ग्रेडिङ पाएका तीन केन्द्रीय बैंकका गभर्नरहरुको सूचीको शीर्ष स्थानमा राखिएको हो ।
गभर्नर दासलाई अमेरिकाको ‘ग्लोबल फाइनान्स’ पत्रिकाले ‘सेन्ट्रल बैंकर रिपोर्ट कार्ड २०२३’ मा ‘ए प्लस’ ग्रेडिङ दिएको हो । त्यस्तै, उत्कृष्ट गभर्नरको सूचीमा दासपछि स्वीट्जरल्याण्डको केन्द्रीय बैंकका गभर्नर थोमस जे जोर्डन र भियतनामका गुयन थि होङ रहेका छन् ।
ग्लोबल फाइनान्सले मुद्रास्फीति नियन्त्रण, आर्थिक वृद्धि लक्ष्य, मुद्रा स्थिरता र ब्याजदर व्यवस्थापनमा सफलताको लागि ‘ए’ देखि ‘एफ’ को स्केलमा ग्रेडहरु प्रदान गर्ने गरेको छ । जसमा ‘ए’ ग्रेडले पूर्णरुपमा सफलताको र ‘एफ’ ग्रेडले पूर्ण असफलताको प्रतिनिधित्व गर्छ । ग्लोबल फाइनान्स पत्रिकाले सन् १९९४ देखि हरेक वर्ष केन्द्रीय बैंकर रिपोर्ट कार्ड प्रकाशित गर्दै आएको छ । यसले युरोपेली संघ, पूर्वी क्यारिबियन केन्द्रीय बैंक, केन्द्रीय अफ्रिकी देशहरुका सेन्ट्रल बैंक र पश्चिम अफ्रिकी राष्ट्रहरूको केन्द्रीय बैंक सहित विश्वका १०१ वटा प्रमुख देश र क्षेत्रहरुका केन्द्रीय बैंकका गभर्नरहरुलाई ग्रेड दिँदै आएको छ ।
विश्वकै उत्कृष्ट गभर्नरको सूचीको पहिलो नम्बरमा परेपछि भारतीय प्रधानमन्त्री नरेन्द्र मोदीले पनि आरबिआईका गभर्नर दासलाई बधाई दिएका छन् ।
