काठमाडौं । चिलिमे इन्जिनियरिङ लिमिटेडले सर्वसाधारणका लागि आइपीओ निष्कासन गर्ने भएको छ । कम्पनीले सो आइपीओ निष्कासन गर्नको लागि क्रेडिट रेटिङ गराएको छ ।

रेटिङ एजेन्सी इक्रा नेपालले गरेको मूल्या‌कंनमा चिलिमे इन्जिनियरिङले त्रिपल बी रेटिङ पाएको छ । यो संकेतले वित्तीय दायित्व समयमै पुरा गर्नका लागि कम्पनी सबल रहेको अवस्थालाई जनाउँछ ।

कम्पनीले २ लाख ९७ हजार कित्ता आइपीआ निष्कासन गर्ने भएको छ । कम्पनीले सेयर बिक्री प्रबन्धमा सिद्धार्थ क्यापिटल लिमिटेडलाई नियुक्त गरेको छ ।

जलविद्युत आयोजना निर्माणमा सार्वजनिक र निजी क्षेत्रको बढ्दो लगानीसँगै इन्जिनियरिङको सेवाको मागसमेत बढ्ने भन्दै इक्रा नेपालले मूल्या‌कंनका लागि यो सकारात्मक पक्ष भएको उल्लेख गरेको छ ।

इक्रा नेपालका अनुसार नेपाल विद्युत प्राधिकरण मुख्य लगानीकर्ता रहेको, कर्जाको दबाब न्यून भएको र वासलातमा नगद मौज्दातसमेत पर्याप्त रहेकाले यसको वित्तीय पक्ष सबल रहेको छ । गत वर्ष कम्पनीले परामर्श सेवाबाट १५ करोड ५० लाख रुपैयाँ आम्दानी गरेको छ ।