काठमाडौँ । माल्टा पठाईदिन्छु भनी रकम ठगी गर्ने व्यक्ति पक्राउ  परेका छन् । तनहुँ जिल्ला व्यास नगरपालीका वडा नं १२ स्थाई घर भई हाल जिल्ला काठमाडौँ थानकोट बस्ने २९ वर्षीय रन्जन पाण्डे प्रकाउ परेका हुन् ।

पक्राउ  परेका  पाण्डेले बिष्णु विक्रम खड्का समेत ४ जनालाई वैदेशिक रोजगारीकालागि माल्टा जान प्रतिव्यक्ती ८ लाख रुपैयाँ लाग्छ भनेका थिए । साथै, माल्टा पुगेपछी फुड डेलिभरीमा काम लगाई दिन्छु भनी मासिक ६ लाख भन्दा धेरै तलव हुन्छ भन्ने विश्वास दिलाई प्रलोभनमा पारी निज पीडितहरुबाट पटकपटक गरी ६ लाख रुपैयाँ रकम लिई सम्पर्क विहीन भएका थिए ।

पिडितहरुले वैदेशिक रोजगार विभागमा प्रतिवादी पाण्डे विरुद्ध निवेदन दिएका थिए । काठमाडौँ अपराध अनुसन्धान कार्यालयबाट खटिएको प्रहरी टोलीले पाण्डेलाई निरन्तर खोजतलास गर्ने क्रममा असोज १६ गते दिउँसो ३:३० बजे जिल्ला काठमाडौँ महानगरपालीका वडा नं २६ सामाखुशीबाट  पक्राउ गरेको हो ।

पक्राउ परेका पाण्डेलाई थप अनुसन्धान तथा कारवाहीको लागि वैदेशिक रोजगार विभाग ताहाचल, काठमाडौँ पठाईएको प्रहरीले जनाएको छ ।