काठमाडौं । मल्टीपर्पोज फाइनान्स लिमिटेडले असोज २९ गतेदेखि अवितरित सेयर लिलामीमा बिक्रि गर्ने भएको छ। कम्पनीले हकप्रद निष्कासन गर्दा बिक्रि नभएको सर्वसाधारण समुहतर्फको ६० हजार ६ सय ५० कित्ता र सस्थापक समुहको ८२ हजार १ सय २३ कित्ता गरि कुल १ लाख ४२ हजार ७ सय ७३ कित्ता सेयर लिलाम गर्न लागेको हो ।
कम्पनीका अनुसार, ‘आवेदन दिंदा सर्वसाधारण समुहतर्फ न्युनतम सय कित्ता र संस्थापक समुहतर्फ न्युनतम हजार कित्ताको लागि आवेदन दिनु पर्ने हुन्छ। अधिकतममा भने पुरै कित्ताका लागि दिन सकिने छ । उक्त लिलामीको सेयरमा कार्तिक १३ गतेसम्म आवेदन दिन सकिने छ । सेयर लिलाम प्रकियाको लागि मुक्तिनाथ क्यापिटल बिक्री प्रबन्धक रहेको छ ।’
लिलामीको सेयरमा मुक्तिनाथ क्यापिटलको कार्यालय नक्साल साथै मुक्तिनाथ विकास बैंकका शाखाहरु थिमी, कुमारीपाटी, विराटनगर, बिरगंज, बिर्तामोड, जनकपुर, हेटौडा, नारायणगढ, पोखरा, बाग्लुंग, बुटवल, घोराही , नेपालगंज, सुर्खेत, धनगढी र महेन्द्रनगर शाखाबाट आवेदन दिन सकिने छ । त्यस्तै, फाइनान्सको जनकपुर स्थित कार्यालयबाट पनि आवेदन दिन सकिने कम्पनीले जानकारी दिएको हो ।
साथै, हाल कायम संस्थापकले मात्र आवेदन दिन सक्ने कम्पनीले बताएको छ । कम्पनीको सेयरको मूल्य न्युनतम एक सय रुपैयाँ कायम गरिएकोले सो भन्दा बढी रकम कबुल गरि आवेदन दिनु पर्ने छ।
त्यस्तै, ५ लाख भन्दा बढीको आवेदन दिनेलाई प्यान नम्बर अनिवार्य गरेको छ । उच्च मूल्य कबुल गर्नेले पहिला सेयर पाउने र दोस्रो बढी मूल्य कबुल गर्नेले सेयर पाउने कम्पनीले जनाएको हो ।
सेयर संख्या कायम रहंदासम्म सो प्रक्रियाबाट सेयर बाँडफाँड हुने कम्पनीले बताएको छ ।
