काठमाडौँ । नेपालमा पहिलो ह्याममेक केवलकार सञ्चालनमा आएको छ । सिन्धुपाल्चोकको चर्चित पर्यटकीय केन्द्र सुकुटेमा ३ सय ६० डिग्री स्विङ लगायत साहसिक खेलका गतिविधिहरू सञ्चालनमा आएको हो ।
कम्पनीका अनुसार, स्विङमा ३ सय ६० डिग्रीमा घुमेर थ्रिलको अनुभव गर्न सकिनेछ । साथै, कम्पनीले भोटेकोसी खोलामाथी २ सय २० मिटर लामो जिपलाइन, २२० मिटर लामो स्काइ रोप सुरु गरेको हो ।
त्यस्तै, स्काइ रोप साइकलमा एक जना बसेर चलाउने तथा जोडि बसेर चलाउन मिल्ने गरि बनाइएको छ । थ्रिल भ्याली प्रालिले करिब एक करोड रुपैयाँको लगानीमा सुकुटेमा स्विङ सहित विभिन्न साहसिक खेलहरू सञ्चालनमा ल्याएको हो ।
साथै, र्याफ्टिङ व्यवसाय गर्दै आएका महेन्द्र श्रेष्ठ, सम्झना खड्का र राज केसीको लगानीमा सुकुटेमा थ्रिल भ्याली सुरु भएको हो । साहसिक खेलका पारखीहरूका लागि लक्षित गर्दै कम्पनीले सञ्चालनमा ल्याएको सञ्चालक श्रेष्ठले जानकारी दिएका छन् ।
कति लाग्छ शुल्क ?
कम्पनीले सञ्चालनमा ल्याएको अवसरमा रिसोर्टले आफ्ना ग्राहकहरूका लागि तिहारसम्म विभिन्न छुटको घोषणा गरेको हो । जसअनुसार स्वीङका लागि ३ सय रुपैयाँ प्रतिव्यक्ति, केबल कारका लागि प्रतिव्यक्ति तीन सय रुपैयाँ, स्काइ साइकलको एक हजार रुपैयाँ प्रतिव्यक्ति तथा डबल स्काइ साइकलको १५ सय रुपैयाँ लाग्ने कम्पनीले जनाएको छ । कम्पनीका अनुसार फ्यामिली पिङका लागि २ सय रुपैयाँ तथा गुलेली पिङका लागि पनि २ सय रुपैयाँ शुल्क कायम गरेको छ ।
कसरी पुग्ने ?
कम्पनीका अनुसार, ‘काठमाडौंबाट दोलालघाट हुँदै सुकुटे पुग्न सकिन्छ । सार्वजनिक तथा निजी सवारी साधनमा सहजै पुग्न सकिने सुकुटे काठमाडौंबाट ६६ किलोमिटरको दूरीमा रहेको छ । काठमाडौंको बसपार्कबाट सार्वजनिक बसमा करिब ३ सय रुपैयाँ भाडा तिर्नुपर्ने हुन्छ । यसबाहेक सुमो लगायतका गाडीले ५ सय रुपैयाँमा सुकुटेसम्म पुर्याउेछन् ।’
