ग्राहकको पैसा नलुटियोस् भनेर दशैंमा बैंक वरपर सादा पोशाकका प्रहरीको गस्ती, ‘बैंक लुट्न खोजे सिधै सुट !’

काठमाडौँ । बैंकबाट निस्किने बित्तिकै ग्राहक लुटिएका घटनालाई मध्यनजर गर्दै दशैंमा काठमाडौं उपत्यका प्रहरी कार्यालयले विशेष योजना बनाएको छ । जसअन्तर्गत धेरै आर्थिक कारोबार हुने बैंक तथा वित्तीय संस्थाहरु वरपर साधा पोसाकका प्रहरीहरु परिचलान गर्ने र विशेष निगरानी बढाउने तयारी प्रहरीको छ ।

उपत्यका प्रहरी कार्यालयका एसएसपी दिनेशराज मैनालीका अनुसार बैंक तथा वित्तीय संस्था वरपर लुटपाटका घटना नहोस् भनेर विशेष निगरानी बढाइएको छ । उनका अनुसार बैंक वरपर साना हतियारसहितका प्रहरीहरु परिचालन गरिएको छ ।

मैनालीका अनुसार चाडपर्वमा प्रभावकारी सुरक्षा व्यवस्था गर्न आवश्यक काम अगाडी बढाइएको छ । उनका अनुसार उपत्यकामा मात्र ५ हजार ८३३ जना प्रहरी सुरक्षाकर्मीहरू परिचालित हुनेछन् ।

प्रहरीलाई शंका लागेका मान्छेलाई समातिहाल्नु भन्ने निर्देशन छ । बैंकको पैसा लुट्न खोज्ने वा ग्राहकको पैसा लुट्न खोजेको देखिए सकेसम्म पक्राउ गर्नु, नसके सिधै शुट गर्नु भन्ने निर्देशनसमेत प्रहरीलाई छ ।