काठमाडौं । काठमाडौंमा शुक्रबार र शनिबार स्टार्टअप एण्ड आईडिया फेस्ट क्याम्प हुने भएको छ । उक्त क्याम्प बानेश्वर, काठमाण्डौँको बैंक्वटमा सर्वसाधाराणले निःशुल्क अवलोकन गर्न सक्नेछन् ।
लिभिङ विथ आईसीटीको मुख्य आयोजनामा हुने उक्त क्याम्पमा सातै प्रदेशका स्टार्टअपसहित एक सय भन्दा बढी डिजिटल स्टार्टअप र इन्नोभेसनहरुको प्रदर्शनी हुने भएको हो । साथै, आईसीटी अवार्ड २०२३ को प्रि इभेन्ट क्याम्पियनको रूपमा हुने स्टार्टअप एण्ड आईडिया फेस्ट तथा स्टिम क्याम्पमा द स्क्वाइड अफ चेन्जमेकरको सहकार्य रहेको छ ।
सो फेस्टमा सातै प्रदेशका ३० भन्दा बढी स्टार्टअपका साथै आईसीटी अवार्ड २०२३ मा प्रतिस्पर्धाबाट छनौट भएका उत्कृष्ट १२ स्टार्टअप, प्रडक्ट र इन्नोभेसनहरुले समेत फेस्टमा आफ्ना आइडिया र प्रडक्टहरु प्रदर्शनी गर्नेछन् । साथै, कार्यक्रममा स्क्वाइड अफ चेन्जमेकरले रोबोट, रकेट, थ्रीडी प्रिन्टङसहित बालबालिकाले बनाएका नयाँ प्रोजेक्टहरुलाई पनि प्रर्दशनीमा राख्ने भएका छन् ।
नेपालमै केही नयाँ काम गरिरहेका स्टार्टअप, विद्यार्थी र इन्नोभेटरहरुलाई प्रवर्द्धन गर्न २ दिने स्टार्टअप एन्ड आइडिया फेस्ट आयोजना गरिएको लिभिङ विथ आईसीटीको अध्यक्ष राजन लम्सालले बताए । उक्त कार्यक्रमको मुख्य आकर्षणको रूपमा नयाँ आईडिया, इन्नोभेसन तथा प्रडक्टको प्रदर्शनी, आईडिया पिचिङ, एष्ट्रोनोमी क्याम्प, रकेट तथा रोबोटिक्स क्याम्प, लगानीको अवसर, गेम र आकर्षक पुरस्कारको समेत व्यवस्था रहेको लम्सालले बताएका छन् ।
यसअघि मंगलबार र बुधबार किंग्स कलेजमा काठमाण्डौँ बाहिरबाट सहभागी हुन आएका स्टार्टअपहरुलाई मेन्टरिङ तथा इन्क्युवेसन सेसनहरु सञ्चालन भइसकेको र आउँदै गरेको क्याम्पमा सहभागी हुने अवलोकनकर्ताले कुनै शुल्क तिर्नु नपर्ने लिभिङ विथ आईसीटीको अध्यक्ष राजन लम्सालले बताएका छन् । साथै, कार्यक्रममार्फत स्टार्टअप र आइडियामा लगानी गर्न चाहनेहरुलाई पनि आयोजकले सहकार्य र इकोसिस्टम विकासका लागि आह्वान गरेको छ ।
त्यस्तै क्याम्पका अवलोकनकर्ताहरुले आफूलाई मन परेका स्टार्टअप र प्रडक्टलाई भोट पनि गर्न सक्नेछन् । नेपालको प्रतिष्ठित प्रविधि अवार्डको रूपमा परिचित आइसिटी अवार्डको आठौं संस्करणमा विभिन्न १३ विधामा पाँच सय बढीको नोमिनेसन प्राप्त भएको लम्सालले जानकारी दिएका छन् ।
हाल आईसीटी अवार्ड २०२३ को नोमिनेसन र छनौट प्रक्रिया सञ्चालनमा रहेको छ । यस पटक आईसिटी अवार्डको ग्रान्ड फिनालेमा सातै प्रदेशका उत्कृष्ट एक स्टार्टअपलाई प्रोभिसियल रिकग्निसन अवार्डसमेत प्रदान गर्ने जानकारी दिएका छन् । आईसीटी अवार्डको ग्राण्ड फिनाले आगामी पुस ६ गते द सोल्टी काठमाण्डौँमा आयोजना हुनेछ।
स्टार्टअप एन्ड आइडिया फेस्ट र स्टिम क्याम्पसँगै अवार्डका लागि दर्जनौँ प्रि–इभेन्ट सञ्चालन हुनेछन् । साथै, कान्तिपुर टेलिभिजनले २ महिनासम्म स्टार्टअप र आइडिया पिचिङको विशेष कार्यक्रमका रुपमा टेलिभिजन सिरिजहरु पनि क्याम्पमा प्रशारण गर्ने भएका छन् ।
