काठमाडौँ । विदेश पठाईदिन्छु भनी रकम ठगी गर्ने व्यक्ति पक्राउ परेका छन् । जिल्ला गोर्खा पृथ्वीनारायण नगरपालीका वडा नं.०६ घर भई हाल जिल्ला काठमाण्डौँ तार्केश्वर नगरपालीका वडा नं.०१मा बस्ने ३५ वर्षिय राजेश श्रेष्ठ पक्राउ परेका छन् ।
वैदेशिक रोजगारीको लागि एस्टोनिया पठाईदिन्छु भन्दै राजेशले जनक बरालसमेत ५ जनासँग प्रतिव्यक्ति ७ लाख रुपैयाँ मागेका थिए । श्रेष्ठले एस्टोनिया पुगेपछि सुपर मार्केटमा १ लाख ५० हजार रुपैयाँ मासिक तलव हुने स्टोर किपर काम लगाइदिन्छु भनी प्रलोभनमा पारेका थिए । उनले निज पीडितहरुबाट पटकपटक गरी ३४ लाख १३ हजार रुपैयाँ रकम ठगी गरी सम्पर्क विहीन रहेका थिए ।
वैदेशिक रोजगार विभागबाट उपत्यका अपराध अनुसन्धान कार्यालयमा राजेशलाई पक्राउ गरी उपस्थित गराइदिन पत्राचार गरेका थिए । सो कार्यालयबाट खटेका प्रहरी टोलीले निज श्रेष्ठको खोजतलास गर्ने क्रममा मिति २०८०-०७-२२ गते काठमाडौँ महानगरपालीका वडा नं.१० नयाँ बानेश्वरबाट पक्राउ गरेका हुन् ।
पक्राउ परेको व्यक्तिको थप अनुसन्धान तथा कारवाहीका लागि वैदेशिक रोजगार विभाग ताहाचल, काठमाण्डौं पठाएको उपत्यका अपराध अनुसन्धान कार्यालयले जानकारी दिएको छ ।
