काठमाडौँ । नेपालको वैदेशिक व्यापारमा आर्थिक मन्दीका कारण निरन्तर कमी आएको छ । भन्सार विभागले बिहीबार सार्वजनिक गरेको चालु आर्थिक वर्ष २०८०-८१ को चार महिनाको तथ्यांकअनुसार आयात र निर्यात दुवैमा कमी आएको हो ।
उक्त तथ्यांकअनुसार आयातमा मात्रै २० अर्ब रुपैयाँभन्दा धेरैको कमी देखिएको छ । विभागका अनुसार साउनदेखि कात्तिकसम्म ५ खर्ब १२ अर्ब ५० करोड रुपैयाँको वस्तु आयात भएको छ । नेपालले गत वर्षको चार महिनामा पाँच खर्ब ३२ अर्ब ६९ करोड १३ लाख रुपैयाँको वस्तु आयात गरेको थियो ।
यस्तै, चार महिनाको अवधिमा नेपालले ५० अर्ब ५६ करोड ५३ लाख रुपैयाँको वस्तु निर्यात गरेको छ । गत वर्षको तुलनामा यो चार अर्ब २० करोड रुपैयाँभन्दा कम हो । नेपालले चार महिनामा चार खर्ब ६१ अर्ब ९३ करोड ८१ लाख रुपैयाँको व्यापार घाटा बेहोरेको छ । यो गत वर्षको सोहि आवधिको तुलनामा झन्डै १ खर्ब रुपैयाँले कम हो ।
गत कात्तिक महिनामा पछिल्लो चार वर्षयताकै कम आयात भएको छ । कात्तिक महिनामा १ खर्ब ४ अर्ब ७४ करोड ४५ लाख रुपैयाँको वस्तु आयात भएको छ । यो ५० महिनापछि सबैभन्दा कम आयात हो ।
त्यस्तै, आर्थिक वर्ष २०७७-७८ मा ९३ अर्ब ३ करोड ८२ लाख रुपैयाँको वस्तु आयात भएकोमा त्यसपछिका वर्षमा मासिक डेढ खर्ब रुपैयाँको हाराहारीमा आयात हुँदै आएको थियो । सरकारले गएको वर्ष आयातमा कडाइ गर्दासमेत कात्तिकमा १ खर्ब ३० अर्ब रुपैयाँभन्दा बढीको वस्तु आयात भएको थियो ।
सरकारले अर्थतन्त्रका मुख्य सूचकहरू राम्रो रहेको बताउँदै आए पनि आन्तरिक अर्थतन्त्रमा भने मन्दी देखिएको छ । बजारमा चहलपहल छैन । मन्दीको असर वैदेशिक व्यापारमा देखिएको विज्ञहरूले बताएका छन् ।
