काठमाडौँ । स्वास्थ्य प्रणाली सुधार गर्नका लागि नेपालले विश्व बैंकबाट झण्डै १४ अर्ब रुपैयाँ सहायता लिएको छ ।
नेपालले विश्व बैंकबाट लिएको सहायतामध्ये १० करोड डलर (झण्डै १३ अर्ब ३० करोड रुपैयाँ) सहुलियतपूर्ण ऋण र ३८ लाख ४० हजार (झण्डै ५१ करोड) रुपैयाँ अनुदान रहेको अर्थ मन्त्रालयले जनाएको छ । विश्व बैंकमार्फत प्राप्त हुने उक्त ऋण अन्तराष्ट्रिय विकास संस्था (आईडीए)मार्फत प्राप्त हुने अर्थ मन्त्रालय र विश्व बैंकले संयुक्त रुपमा जारी गरेको विज्ञप्तीमा उल्लेख छ ।
सहुलियतपूर्ण ऋण र अनुदान दुवै सहायतका लागि बिहीबार विद्युतीय हस्ताक्षरसमेत गरिएको छ । यो विश्व बैंकद्धारा नेपालमा वित्तीय लगानी गरिएको पहिलो विद्युतीय हस्ताक्षरित आयोजना हो ।
सहायता दिने÷लिने सम्झौतामा नेपाल सरकारका तर्फबाट अर्थसचिव डा.कृष्णहरि पुष्कर र माल्दिभ्स, नेपाल र श्रीलंकाका लागि विश्व बैंकका राष्ट्रिय निर्देशक फारिस हदाद जेर्भोसले हस्ताक्षर गरेका छन् । विश्व बैंकबाट प्राप्त उक्त सहायता संघीय तहको स्वास्थ्य बीमा बोर्ड, कोशी र गण्डकी प्रदेशका छनोट गरिएका प्रदेश र स्थानीय तहको समन्वयमा स्वास्थ्य तथा जनसंख्या मन्त्रालयले कार्यान्वयन गर्नेछन् ।
