काठमाडौँ । एनआईसी एशिया क्यापिटलले ‘एनआईसी एशिया ग्रोथ फण्ड २’ नामक म्युचुअल फण्डको बिक्री खुला गरेको छ । क्यापिटलले प्रतिइकाई १० रुपैयाँ अंकित मूल्यमा १ अर्ब रुपैयाँ बराबरको १० करोड इकाई बिक्रीमा ल्याएको हो । उक्त फण्डमा न्यूनतम १०० इकाईदेखि अधिकतम १ करोड इकाईसम्मका लागि आवेदन दिन सकिनेछ ।
एनआईसी एशिया बैंकको उक्त म्युचुअल फण्डमा मेरो सेयरबाट आवेदन दिन सकिन्छ । उक्त म्युचुअल फण्डमा लगानीकर्ताले छिटोमा मंसिर ७ र ढिलोमा मंसिर १८ गतेसम्म आवेदन दिन सक्नेछन् ।
बिक्री खुला गरिएको कुल इकाईमध्ये कुल बिक्री भएको इकाईसंख्याको १५ प्रतिशत वा १ करोड ५० लाख इकाई कोष प्रवर्धक एनआईसी एशिया बैंकलाई सुरक्षित गरिनेछ । त्यस्तै, बाँकी रहेको ८ करोड ५० लाख इकाईका लागि सर्वसाधारणले आवेदन दिन सक्नेछन् ।
बैंकले ल्याएको उक्त म्युचुअल फण्डलाई इन्फोमेरिक्स क्रेडिट रेटिङ कम्पनीले ‘ए माइनस’ रेटिङ प्रदान गरेको छ । योजनाले प्राप्त गरेको उक्त रेटिङले लगानीमा कम जोखिम रहेको जनाउँछ । उक्त फण्डको धितोपत्र निष्काशन तथा बिक्री प्रबन्धक एनआईसी एशिया क्यापिटल लिमिटेड रहेको छ ।
