काठमाडौँ । काठमाडौँबाट नक्कली नोटसहित दुई महिला पक्राउ परेका छन् । नक्कली नोटको कारोबार गर्ने गरेको सूचनाको आधारमा सोमबार राती प्रहरीले दुई जना महिलालाई पक्राउ गरेको हो । 

पक्राउ पर्नेमा शंखरापुर नगरपालिका ७ कोलागालमा कोठा भाडामा बस्ने सिन्धुपाल्चोककी ४९ वर्षीया सिर्जना थापा र बूढानिलकण्ठ नगरपालिका १२ कपन बस्ने ओखलढुंगाकी ४१ वर्षीय मैया कुमारी घिमिरे रहेका छन् । पक्राउ परेकी सिर्जनाको साथबाट प्रहरीले १ हजार दरको १ लाख ४० हजार र कुमारीको साथबाट १ हजार दरको २१ हजार नक्कली नोट बरामद गरेको छ । 

प्रहरीका अनुसार सिर्जनालाई प्रहरी प्रभागको टोलीले शंखरापुर–७ कोलागालबाट र मैयालाई प्रहरी प्रभाग कपनको टोलीले बुढानिलकण्ठ–१२ निलोमाइक्रो पार्क नजिकबाट पक्राउ गरेको हो । 

पक्राउ परेका दुवैजनाविरुद्ध थप अनुसन्धान भइरहेको प्रहरीले जनाएको छ ।