काठमाडौं । सोनापुर मिनिरल्स एण्ड आयल लिमिटेडको सेयर मूल्य आइपीओको मूल्य भन्दा पनि तल झरेको छ । बुधबारको बजारमा यसको मूल्य प्रतिकित्ता २३४.८० रुपैयाँ पुगेको हो ।

नेपाल स्टक एक्सचेञ्जमा सुचिकृत भएर आइतबार पहिलो कारोबार सुरु गरेको दिन देखि सोनापुरको सेयरमा लगातार नेगेटिभ सर्किट लागेको थियो । सोनापुरले प्रतिकित्ता १०० रुपैयाँ अंकित मूल्यमा १ सय ३७ रुपैयाँ ५८ पैसा थप गरेर कुल २ सय ३७ रुपैयाँ ५८ पैसामा आइपीओ जारी गरेको थियो ।

लगातार यसको सेयरमा गिरावट आउँदा सोनापुरका सेयरधनी तनावमा परेका छन् । कारोबारको पहिलो दिन आइतबार १० प्रतिशतले घटेर यसको मूल्य ३ सय ५० रुपैयाँबाट झरेर ३ सय १५ रुपैयाँमा पुगेको थियो । त्यस्तै, दोश्रो दिन पनि सो सेयरमा नेगेटिभ सर्किट लागेर ३ सय १५ रुपैयाँबाट २ सय ८३ रुपैयाँ ५० पैसा कायम भएको थियो ।

त्यसैगरी, तेश्रो दिन पनि सोनापुरको सेयर २ सय ८३ रुपैयाँ ५० पैसाबाट झरेर २ सय ५५ रुपैयाँ ५० पैसामा पुगेको थियो । आज चौथो दिन बुधबार २ सय ५५ रुपैयाँ ५० पैसाबाट तल झरेर २ सय ३४ रुपैयाँ ८० पैसा पुगेको छ ।