काठमाडौँ । कागजमा लेखिएको कुनै त्रुटी भए हामी सजिलै प्रिन्टिङ मिस्टेक भानिदिन्छौँ । तर त्यो गल्ती प्रिन्टरको होइन, टाइप गर्नेको हुन्छ । बर्षौंदेखि यसरी टाइप गर्नेले गरेको अपजस प्रिन्टरले पाएजस्तै नेप्सेले गरेका अनेक हर्कतको अपजश नेप्सेको प्राविधिक टिमले पाईरहेको हुन्छ । जनताको नजरमा भ्रष्टाचारमा लिप्त एउटा ‘थर्ड क्लास कम्पनी’ लाई नेप्सेले कमिसन खाएर दिएको जिम्मेवारीका कारण अहिले लगानीकर्ता मारमा छन् । हुनुपर्ने समयमा सेयरको कारोबारसम्म रोकिने स्थिति देखिएको छ ।
बुधबार पनि त्यस्तै भयो । सिष्टममा अलिअलि चलखेल गर्न नपुगेर थप चलखेलको प्रयास गर्न खोज्दा टेक्निकल बग देखियो, जसका कारण नेप्सेमा प्रिओपन सेसनमा कारोबार नै हुन सकेन । प्रिओपनिङ कारोबार हुन नसकेपछि ११ बजेदेखि हुने नियमित कारोबारमा पनि समस्या देखियो । नेप्से यसलाई सामान्य प्राविधिक समस्या भनेर टार्न खोजिरहेको छ, तर यो लापर्वाही र चलखेल आम लगानीकर्ताको विपक्षमा गरिएको अक्षम्य हर्कत हो।
नेप्से आफैंमा भ्रष्टाचारमा चरम लिप्त भएको कम्पनी हो । ‘आफैँ केजाती, आफैँ झाँक्री’ जसरी नेप्सेले वर्षौंदेखि चलखेल गरेर माफिया पोसाईरहेको छ, आम सेयर लगानीकर्तालाई सोसीरहेको छ । नेप्सेको यो मनपरी रोक्न पनि नयाँ स्टक एक्सचेञ्ज आवश्यक छ ।
अहिले सिमित घरानालाई नयाँ एक्सचेञ्ज दिन खोजियो, भ्रष्टाचार गर्न खोजियो भन्ने भाष्य निर्माण गरेर नयाँ स्टक एक्सचेञ्ज रोक्ने काम हुँदैछ । भ्रष्टाचार गरेको प्रमाणित भए कानुन विपरित काम गर्नेलाई कार्वाही गर्नुपर्छ भन्ने कुरामा कुनै दुईमत हुँदैन, छैन । तर यहि अप्रमाणित कारण देखाएर अव पनि नयाँ स्टक एक्सचेञ्ज रोक्ने काम भयो भने त्यसले आम लगानीकर्तालाई कुनै पनि हित गर्दैन ।
