">
काठमाडौँ । काठमाडौँको तीनकुनेबाट प्रहरीले धमाधम दुर्गा प्रसाईंका समर्थकलाई पक्राउ गरेको छ । शुक्रबार प्रसाईंको घोषणापछि आन्दोलनलाई समर्थन गर्न तीनकुने पुगेका प्रसाईंका समर्थकलाई प्रहरीले पक्राउ गरेको हो । प्रहरीले प्रसाईंका समर्थक मात्र होइन, शंका लागेका सबैलाई धमाधम पक्राउ गरिरहेको छ ।
शंकाकै भरमा प्रहरीले तीनकुने क्षेत्रबाट नागरिक पक्राउ गर्न थालेपछि सर्वसाधारण पनि आतंकित बनेका छन् । प्रहरीले तीनकुने क्षेत्रमा प्रदर्शन गर्न नपाइने भन्दै भकाभक प्रसाईंका समर्थकलाई पक्राउ गरेको छ ।
प्रसाईंका समर्थक भन्दै प्रहरीले सोधपुछ नै नगरी सर्वसाधारणलाई पनि जबरजस्ती नियन्त्रणमा लिएको छ । ‘म आन्दोलनमा आएकै होइन । म कसैको समर्थक र विरोधी पनि होइन । बाटो हिँडिरहेका बेला प्रहरीले एक्कासि समातेर भ्यानमा हाल्न खोज्यो ।’, तीनकुनेबाट प्रहरीको नियन्त्रणमा परेका एक सर्वसाधारणले भने, ‘किन समातेको भन्दा माथिको आदेश मात्रै भनियो । पछि आन्दोलनमा होइन, ससुराली आएको हो भन्दै घर नै देखाएपछि बल्ल छोडियो ।’
यता प्रहरीले भने तीनकुने क्षेत्रमा आन्दोलन वा प्रदर्शन गर्ने जोकोहीलाई पनि पक्राउ गर्ने चेतावनी दिएको छ । अहिले प्रहरीले तीनकुनेमा ‘तपाईहरुको प्रदर्शनस्थल बल्खु हो, बल्खुमा जानुस् । यहाँ भेला भएर आन्दोलन भेला गर्नुभयो भने कानुनअनुसार कारवाही गरिनेछ’ भन्दै माइकिङ गरिरहेको छ ।
शुक्रबार सरकारले व्यवसायी दुर्गा प्रसाईंलाई ‘अघोषित नजरबन्द’मा राखेको छ । बिहानैदेखि प्रसाईंको निवासमा ठूलो संख्यामा प्रहरी परिचालन गरिएको छ ।
