काठमाडौँ । उन्नति सहकार्य लघुवित्त वित्तीय संस्था लिमिटेडको एफपीओमा आज (कात्तिक २१) गतेदेखि आवेदन दिन सकिने भएको छ । कम्पनीले सर्वसाधारणको पूँजी संरचना ३० प्रतिशत कायम गर्न जारी गरेको एफपीओमा आज (कात्तिक २१) गतेदेखि आवेदन दिन सकिने भएको हो ।
साविकको उन्नति लघुवित्त र सहकार्य लघुवित्तबीचको मर्जर तथा एक्विजिसनपछि कम्पनीको पूँजी संरचना संस्थापक समूहको ७५४५ प्रतिशत र सर्वसाधारणको २४.५५ प्रतिशत रहेको थियो । सोही पूँजी बैंक तथा वित्तीय संस्था सम्बन्धी ऐन २०७३ को दफा ९ बमोजिम ३० प्रतिशत पुर्याउन लघुवित्तले एफपीओ जारी गरेको हो ।
लघुवित्तले १ करोड ७८ लाख ४५ हजार १ सय १८ रुपैयाँ बराबरको प्रतिकित्ता १०० रुपैयाँ अंकित मूल्यका दरले १ लाख ७८ हजार ४५१.१८ कित्ता सेयर निष्कासन गरेको हो । लघुवित्तले जारी गरेको एफपीओमा कात्तिक २४ गतेसम्म आवेदन दिन सकिनेछ । लघुवित्तको धितोपत्र निष्कासन तथा बिक्री प्रबन्धक सिद्धार्थ क्यापिटल रहेको छ ।
उक्त एफपीओमा न्यूनतम १० कित्तादेखि अधिकतम १ हजार कित्तासम्मका लागि आवेदन दिन सकिनेछ । एफपीओ निष्कासनका लागि क्रेडिट रेटिङ कम्पनी इक्रा नेपालले लघुवित्तलाई इक्रा एनपी इस्युअर रेटिङ बी प्लस प्रदान गरेको छ । यसले कम्पनीको वित्तीय दायित्व बहन गर्ने क्षमतामा उच्च जोखिम रहेको संकेत गर्छ ।
