काठमाडौं । अपर तामाकोशी हाइड्रोपावर कम्पनीले पहिलो त्रैमासको वित्तीय विवरण सार्वजनिक गरेको छ । हाइड्रोपवारले सार्वजनिक गरेको अपरिस्कृत वित्तीय विवरण अनुसार कम्पनीले १ अर्व ७२ लाख रुपैयाँ खुद नाफा आर्जन गरेको छ । जुन खुद नाफा अघिल्लो वर्षको तुलनामा २३.२६ प्रतिशतले धेरै हो ।

गत आर्थिक वर्षको सोहि अवधिमा कम्पनीले ७९ करोड ७७ लाख रुपैयाँ नाफा आर्जन गरेको थियो । कम्पनीको खुद नाफा संगै विद्युत बिक्रीबाट हुने आम्दानी समेत बढेको छ ।  हाइड्रोपावरको विद्युत बिक्रीबाट हुने आम्दानी ३ अर्व ५६ करोड रुपैयाँबाट बढेर ३ अर्व ७१ करोड रुपैयाँ पुगेको छ ।

त्यसैगरी, अपर तामाकोशीको कर्मचारी संचालन खर्च ११ करोड १८ लाख रुपैयाँबाट घटेर ८ करोड २७ लाख रुपैयाँमा पुगेको छ । कम्पनीको चुक्ता पुँजी १५ अर्ब ९० करोड रुपैयाँ रहेको छ भने रिटेन्ड अर्निङ शीर्षक ६ अर्ब २४ करोड रुपैयाँ ऋणात्मक छ ।

कम्पनीले अन्य स्रोतमार्फत ४ लाख ६ हजार रुपैयाँ मात्र आम्दानी गरेको छ । हाइड्रोपावरको प्रतिसेयर आम्दानी ६ रुपैयाँ ३० पैसा र प्रतिसेयर नेटवर्थ ६० रुपैयाँ ९७ पैसा छ ।